• Imprimeix

Presentacion deth director

Sigatz benvengudi e benvengudes ara Escòla d’Administracion Publica de Catalonha, ua institucion centenària, creada er an 1912 per Enric Prat de la Riba, que da formacion as servidors e as emplegats deth sector public, e tanben as elegidi enes diuèrsi nivèus dera Administracion. Era Escòla vò èster un referent nacionau entre es agents promotors dera formacion en sector public en encastre deth sistèma universitari catalan.

Aué, en un entorn de complexitat creishenta, era Administracion publica s’afronte a cambiaments constants ena natura des enjòcs publics, enes actors que s’i restaquen, enes expectatives des ciutadans e enes estruments que i a ara sua posita. Un entorn que requerís, mès que jamès, uns emplegats e directius publics preparadi, motivadi e engatjadi damb eth servici ar interès generau.

Era nòsta mission ei, dempús hè mès de 100 ans, melhorar e innovar es administracions publiques catalanes per mejan dera formacion e dera recèrca en matèria de gestion publica, entà promòir ua cultura e ues valors partejades de servici public qu'ajuden es institucions publiques a integrar es naui membres ath sòn entorn de trabalh, a melhorar es resultats des persones que i trabalhen, entà que desvolòpen es sues responsabilitats e preparen as persones dera organizacion entàs cambiaments futurs.

Que trabalham entà qu'era formacion des emplegats e directius publics contribuïsque ath sòn desvolopament competenciau, personau e professionau. Que promoiguem era formacion per competéncies, era formacion sus mesura e es equipes de trabalh multidisciplinàries e proporcionam estruments entar aprendissatge continu, era innovacion, era creativitat, es lideratges collaboratius e eth cambiament de paradigma der aprendissatge, entre d’autes causes. Tot açò en capitalizant eth potenciau des TIC, mejançant, per exemple, er autoaprendissatge e es publicacions electroniques en dubèrt.

En fin, mès non per açò ei ua mission mens importanta, era Escòla promò era formacion des nauti directius deth sector public damb mestratges e pòstgras pròpris o ben acordadi damb es universitats catalanes. Promoiguem tanben era recèrca, er estudi e era difusion en matèria d’Administracion publica entà arreconéisher e partejar es accions innovantes e es bones practiques, generar contenguts preciosi tara comunautat e vier referents a nivèu internacionau. Ei per açò, qu'auem acòrds de collaboracion damb escòles similares ara nòsta en diuèrsi estats deth mon (França, Alemanha, eth Reiaume Unit, Itàlia, Russia, eca.) e damb diuèrses organizacions consagrades ara formacion des futurs gestors publics.

Era gestion publica a d’afrontar naui scenaris e eth ròtle deral Escòla d’Administracion Publica de Catalonha ei clau entà bastir era administracion deth sègle XXI, mès eficienta, mès qualificada, mès transparenta, mès professionau e mès intègra. Auem, per exemple, un ròtle actiu en desplegament dera Lei 19/2014, de 29 de deseme, de transparéncia, accès ara informacion e bon govèrn e a assentar es bases deth nau modèl institucionau impulsat peth Plan de reforma dera Administracion dera Generalitat de Catalonha e deth sòn sector public. Ena actuau societat dubèrta, ua entitat coma era nòsta s’a de constituïr coma referent institucionau entà assegurar çò qu'ei mès important: qu'es emplegats e directius publics siguen reauments ath servici des ciutadans.

En aguest web trobaratz tota era informacion restacada damb era nòsta activitat e es servicis qu'aufrim. Non dobtetz a visitar es nòsti hilats sociaus e, sustot, a mandar-mos comentaris e suggeriments. Eth nòste compromís ei contribuïr ara regeneracion democratica qu'aué reclame era societat.

Agustí Colomines i Companys

Director dera Escòla d'Administracion Publica de Catalonha

Data d'actualització:  16.06.2017